15
04.2019

7個習慣助你成為一個快樂的人

生活品味(玩樂)   文化政經  

香港樓價高、物價高、人口物度高、空氣污染指數高,偏偏快樂指數就奇低!其實快唔快樂,唔一定係取決於地方嘅,只要你個人識得尋找快樂之道,咁去都邊都會快樂架啦!大家一齊嚟培養以下7個習慣,話唔定有一日香港都可以成為全球最快樂城市架!

多幫助他人
所謂「施比受更為有福」、「助人為快樂之本」,要獲得快樂,其實唔一定要得到啲咩嘅,施予都一樣得架!讓座畀有需要嘅人、幫老人家買枝旗、落大雨借把遮畀人,雖然唔係啲咩大不了嘅善舉,但係幫到人,人哋開心之餘,你又開心,何樂而不為呢?呢種快樂,唔係物質可以媲美到架!

多做運動
做運動唔單止可以鍛鍊肌肉、keep fit、促進新陳代謝、排走壓力荷爾蒙、提升睡眠質素等等,大腦仲會釋放大量安多酚,令人產生愉快嘅感覺,加上做運動可以分散注意力,讓我們暫時忘記緊張和焦慮。因此,想擁有一個身心健康的人生,就一定要培養運動的習慣喇!

少抱怨
香港人之所以唔快樂,大多數原因係因為大家有好多怨氣,但冇地方發洩,唯有不停吐苦水,A同完B呻,B又同C呻,沒完沒了,想有一個快樂人生,抱怨呢個習慣就要改喇!一嚟呻完又改變唔到件事,聽你呻嗰個又覺得辛苦,係咁畀你負能量轟炸,倒不如一人少句,大家開開心心飲返杯嘢,第日瞓醒就當咩事都冇啦!

積極學習新事物
點解有啲人上咗年紀好似成日鬱鬱寡歡咁,有啲人就好有活力、好開心咁架呢?其實一切都係取決於你嘅心態架啫!所謂「活到老,學到老」,即使早已脫離求學階段,呢個世界都仲有好多知識等住大家去發掘,唔好屈埋自己喺個comfort zone度,積極以一個謙卑、不恥下問嘅心態,認識多啲呢個世界,增廣見聞,相信你一定會畀依家快樂好多。

認真工作
工作有好成績,人先有滿足感、成就感架嘛!認真對待自己的工作,唔hea做、唔得過且過,返工畀啲幹勁同上進心!做事認真,老闆安心,你又開心,最重要的是,在工作上找到自己的定位同目標,有方向感,唔迷失,快樂就係咁簡單!

享受當下
好多人唔快樂,係因為佢哋睇唔到未來,對前景感到迷茫,其實人又唔係神仙又唔係先知,點會預測到未來呢?與其喺度杞人憂天,不如活在當下,例如享受一啲日常生活嘅小確幸:今日去買咖啡店員喺個杯度畫咗個笑哈哈畀自己,食lunch同一大班同事去咗飲新開嘅珍珠奶茶,夜晚返到屋企知道阿婆血糖正常返唔洗食藥,係啊呢啲事都唔關乎將來,但既然將來係改變唔到亦預計唔到,不如為當下發生梗嘅事而快樂,而唔係為以後未知嘅事擔憂啦!

善用時間
一個人無所事事,放假淨係識得hea喺屋企撳手機、睇電視,仲學人講咩尋找快樂?快樂應該係充實自己,豐富自己嘅人生!試想吓,食頹飯,大家都唔制;頹廢嘅人生,大家又點能夠容忍呢?好好為自己安排時間,在有限的人生,創造無限的可能!咁嘅人生先至快樂、先不枉過架嘛!

無論係快樂抑或傷心,都可以係因為一件好小嘅事而引起,但既然開心同唔開心都係咁容易就可以發生,點解唔揀開開心心去面對人生呢?講多無謂,一齊嚟建立快樂小習慣啦!

文:Noelle

更多打工仔分享,追蹤 ECjobsonline 專頁 或 瀏覽 www.ecjobsonline.com

發表於2019.4.15
留言(0)
博客名稱 :
ECjobsonline.com 搵工易
網誌名稱:
ECjobsonline 搵工易
使用天數:1,466
年齡:4
按月份瀏覽
    2019
  • 一月
  • 二月
  • 三月
  • 四月
    2018
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 攝影寫真
  • 戀愛心情
  • 文化政經
  • 其他
  • 財經生活
  • 台灣館
自行分類